Ватанни ҳимоя қилиш — шарафли бурч ва улуғ ибодатдир!

Ватанни ҳимоя қилиш — шарафли бурч ва улуғ ибодатдир!

14 январь —Мардлик, садоқат ва ватанпарварлик байрами!

14 январь — юртимизда алоҳида ҳурмат ва ифтихор билан нишонланадиган улуғ сана. Бу кун — Ватан тинчлиги, халқ осойишталиги йўлида хизмат қилаётган мард ва фидоий ўғлонларимизни улуғлаш кунидир. Ватан ҳимоячилари куни нафақат ҳарбийлар, балки юртига содиқ ҳар бир фуқаро учун ғурур байрамидир.

Ўзбекистон Республикаси Қуролли Кучлари мустақиллигимизнинг ишончли таянчи, давлат хавфсизлигининг мустаҳкам қалқонидир. Юртимиз осмони тинч, чегараларимиз дахлсиз бўлишида Ватан ҳимоячиларининг меҳнати, жасорати ва фидоийлиги беқиёсдир.

Ватан ҳимояси — муқаддас бурчдир.Ватанни ҳимоя қилиш — ҳар бир эркак фарзанд учун шарафли ва муқаддас бурч. Бу нафақат қўлга қурол олиб хизмат қилиш, балки юртга садоқат, қонунга итоат, тинчликни қадрлаш демакдир. Бугунги кунда Ватан ҳимоячилари замонавий билим, юксак ҳарбий маҳорат ва маънавий баркамолликка эга бўлиб, юртимиз тараққиётига муносиб ҳисса қўшмоқдалар.

Ислом таълимотида ҳам Ватанни ҳимоя қилиш улуғ ибодат сифатида эътироф этилади. Чунки тинчлик бор жойдагина имон, илм ва тараққиёт бўлади. Шу боис Ватан посбонлари — халқ дуосида, эл ардоғида. Исломда инсон ҳаёти, оиласи ва юрти хавфсизлигини сақлаш жуда муҳим ҳисобланади. Пайғамбаримиз Муҳаммад шундай деганлар:

«Бир кун, бир кеча Ватанни қўриқлаш Аллоҳ йўлида қилинган кўп ибодатлардан афзалдир» .

Бу ҳадисдан маълум бўладики, Ватан посбонлиги нафақат дунёвий хизмат, балки савобли амал ҳамдир. Чунки Ватан тинч бўлса, масжидлар очиқ, илм тарқалган, болалар хавфсиз тарбияланади.Мардлик ва садоқат — мўмин сифатидир.

Қуръони Каримда Аллоҳ таоло мард инсонларни мақтаб шундай дейди:

«Аллоҳ йўлида собитқадам бўлганларни Аллоҳ яхши кўради».(Саф сураси, 4-оят ).

Ватан ҳимоячилари сабр, интизом, вафо ва масъулият билан хизмат қиладилар. Бу сифатлар ҳақиқий мўминга хос фазилатлардир. Улар нафақат қурол билан, балки юксак ахлоқ, ҳалоллик ва қонунга итоат билан Ватанни асрайдилар.

Ватан ҳимоячилари куни — ёш авлодни ватанпарварлик, жасорат ва масъулият руҳида тарбиялашда муҳим аҳамиятга эга. Ҳарбий хизмат мактаби ёшларни иродали, сабр-тоқатли, интизомли қилиб тарбиялайди. Бугунги кунда кўплаб ёшларимиз ҳарбий хизматни шараф деб билиб, Ватанга хизмат қилишни ўз ҳаётининг олий мақсадига айлантирмоқдалар.

14 январь — Ватан ҳимоячилари куни бизга тинчликнинг қадрини, осойишта ҳаётнинг нақадар улуғ неъмат эканини яна бир бор эслатади. Ватан ҳимоячиларига бўлган ҳурмат ва эътибор — бу Ватанга бўлган муҳаббат белгисидир.Барча Ватан ҳимоячиларини ушбу улуғ байрам билан табриклаб, уларга соғлик, куч-қувват, оилавий бахт ва хизматларида омад тилаймиз. Юртимиз тинч, осмонимиз мусаффо бўлсин!

ЎМИ Сурхондарё вилояти вакилининг хотин -қизлар масалалари бўйича ўринбосари Хосият Қосимова