Yangi yil – yangi maqsadlar sari

Yangi yil – yangi maqsadlar sari

Inson hayoti — bu qarorlar yig‘indisidir. Har bir yangi yil esa inson oldiga yangi tanlovlar qo‘yadi: o‘z ustida ishlash yoki eski odatlar bilan qolish, harakat qilish yoki bahonalar bilan vaqt o‘tkazish, maqsadli yashash yoki befarqlik botqog‘iga botish. Ayniqsa, yoshlar uchun yangi yil — bu orzularni rejalarga, rejalarni esa amallarga aylantirish imkonidir. Islom dini yoshlarni faqat ibodat bilan cheklanib qolishga emas, balki fikrlaydigan, harakat qiladigan va jamiyatni o‘zgartiradigan kuch bo‘lishga chorlaydi. “Sen bugun qanday bo‘lsang, ertaga ham shunday qolasan — agar o‘zgarishga qaror qilmasang.”

Vaqt — ortga qaytmaydigan eng qimmat boylik. Qur’oni Karimda Alloh taolo vaqt bilan qasam ichishi bejiz emas: “Tongga qasam”, “Asrga qasam”, “Kechaga qasam”. Bu oyatlar insonni uyg‘otadi: vaqtni angla, uni qadrlagin.

Payg‘ambarimiz Muhammad ﷺ shunday deganlar: “Besh narsani besh narsadan oldin g‘animat bil: qarilikdan oldin yoshlikni, kasallikdan oldin sog‘likni, faqirlikdan oldin boylikni, mashg‘ullikdan oldin bo‘sh vaqtni, o‘limdan oldin hayotni.” (Hokim rivoyati)

Yoshliging — senga berilgan omonat. Yosh inson bugun telefon ekranida soatlab vaqt o‘tkazsa, ertaga ilm, tajriba va natija yetishmasligidan afsus chekadi.

Islomda rivojlanish tashqi o‘zgarishdan emas, balki ichki islohotdan boshlanadi. Yangi yil — bu o‘z qalbimiz bilan halol suhbat qurish fursatidir.

“Sen o‘zingdan qochib qutula olmaysan.”

Hazrati Ali (r.a.) aytganlar: “Kim o‘z nafsini tanisa, Robbisini tanir.”

Muhasaba qilish — o‘zini ayblash emas, balki o‘zini to‘g‘rilashdir.

“Tavba — mag‘lubiyat emas, balki kuch belgisi.”

Chunki faqat kuchli odamgina xatosini tan oladi va uni tuzatishga harakat qiladi.

Islomda maqsadsiz hayot — kemasiz dengizga o‘xshaydi. Payg‘ambarimiz ﷺ shunday marhamat qilganlar: “Amallar niyatga bog‘liq.”

Demak, yangi yil maqsadlari:

• aniq,
• halol,
• foydali,
• Alloh roziligiga yo‘naltirilgan bo‘lishi shart.

Maqsad qo‘yishda yoshlar yo‘l qo‘yadigan xatolar:

1. Juda katta, lekin rejasiz maqsadlar
2. Boshqalarga taqlid qilib qo‘yilgan maqsadlar
3. Sabr yetishmasligi

“Alloh shoshqaloqlarni emas, sobitlarni sevadi.”

Yangi yil uchun yoshlar belgilashi lozim bo‘lgan asosiy yo‘nalishlar

 

1. Iymon va ibodatda o‘sish

Yangi yilni namozni mustahkamlashdan boshlagan yosh — eng to‘g‘ri yo‘lni tanlagan yoshdir.

“Namoz — hayotdagi tartibning boshlanishi.”

Kichik qadamlar bilan boshlash ham katta yutuqdir.

 

2. Ilm va tafakkur

Ilm — musulmonning qurolidir. “Ilmsiz ibodat — qanotsiz qush.”

Yoshlar:

• diniy bilim,
• dunyoviy fan,
• kasbiy mahoratni birga rivojlantirishi zarur.

3. Axloqiy kamolot va shaxsiy intizom

Chiroyli axloq — Payg‘ambarimiz ﷺning eng asosiy sunnatlaridan biridir.

“Men go‘zal axloqni mukammal qilish uchun yuborildim.”

“Axloqli yosh — kelajak yetakchisi.”

4. Jismoniy va ruhiy sog‘lomlik

Islom tanani ham omonat deb biladi.

“Kuchli mo‘min zaif mo‘mindan yaxshiroq va Allohga mahbubroqdir.”
(Muslim rivoyati)

 

5. Jamiyatga foyda keltirish va yetakchilik

Yoshlar — ummatning tayanchi. “Sen faqat o‘zing uchun emas, jamiyating uchun ham yashagin.” Bugungi yoshlar:

• befarqlik,
• ma’naviy bo‘shliq,
• vaqt isrofi bilan yuzlashmoqda.

Islom esa:

• maqsad,
• intizom,
• ma’naviy barqarorlikni taklif qiladi.

“Kim Alloh bilan bo‘lsa, u hech qachon yolg‘iz emas.”

Ey Aziz yoshlar! Siz oddiy inson emassan. Sizda kuch bor. Sizda aql bor. Sizda imkon bor. Eng muhimi — siz tanlash huquqi bor. “Bugun siz tanlagan yo‘l — ertangi qismatingizdir.”. “Alloh sizni muvaffaqiyat uchun yaratgan, mag‘lubiyat uchun emas.” Qo‘rquvni chetga sur, bahonalarni tashla, bugundan boshla. “Boshlash mukammal bo‘lish shart emas, lekin mukammallik boshlashsiz bo‘lmaydi.”

Yangi yil — va’da emas, mas’uliyatdir. Agar kimki bugun o‘zini o‘zgartirishga qaror qilsa, Alloh uning yo‘lini ochadi. “Agar sen bir qadam tashlasang, Alloh sen tomon o‘n qadam tashlaydi.” Bugun qilgan tanlovlaring ertangi hayotingni belgilaydi. Yangi yilni uyg‘oq qalb, toza niyat va qat’iy maqsad bilan boshlagin. Alloh taolo barcha yoshlarni ilmli, iymonli, sobitqadam va ummatga foydali bandalaridan qilsin. Omin.

 

Yarashev Xabib – Surxondaryo viloyati, Termiz shahri “Manguzar” jome masjidi imom noibi