Сунъий интеллектга бағишланган халқаро анжуман бошланди

Сунъий интеллектга бағишланган халқаро анжуман бошланди

Бугун, 19 январь куни Қоҳирада Миср Президенти Абдулфаттоҳ ас-Сиси ташаббуси билан ташкил этилган сунъий интеллект даврида касблар ва соҳалар истиқболига оид халқаро конференция бошланди. Унда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бошчилигидаги делегация иштирок этмоқда. 

Қуръони карим тиловати ва хайрли дуолар билан бошланган анжуман очилиш маросимида Миср Вақф вазири, профессор Усома Саййид Азҳарий, Миср бош имоми ўринбосари, Азҳари шариф вакили, доктор Муҳаммад Абдурраҳмон ад-Дувайний, мамлакат муфтийси Назир Муҳаммад Айёд, таниқли уламо Шавқий Аллом, Россия марказий диний идораси раиси, муфтий Талъат Тожиддин, Баҳрайн ислом ишлари бўйича олий кенгаш раиси Шайх Абдураҳмон бин Муҳаммад бин Рошид ал-Халифа, Иордания Вақф, ислом ишлари ва муқаддас қадамжолар вазири Муҳаммад Аҳмад Муслим ал-Халояла каби давлат ва дин арбоблари, мусулмон оламининг нуфузли шахслари  ҳамда 50 га яқин давлатдан илмий тадқиқот ва диний муассасаларнинг олим ва мутахассислари қатнашмоқда. 

Халқаро анжуманда иштирокчилар сунъий интеллект даврида илм-фан, соҳалар ва касб-ҳунарнинг тараққиёт ривожидаги ўрни ва истиқболи тўғрисида маъруза қилишади. Шунингдек, Ислом оламида айни йўналишдаги амалий ютуқлар сарҳисоб қилиниб, замонавий фиқҳий масалаларга биргаликда ечим бериш каби илмий масалалар муҳокама этилади. 

Ўзбекистон мусулмонлари идораси Матбуот хизмати